Rəhbərlik

Əsas səhifəHaqqımızda

Bakı şəhər Baş Polis İdarəsinin rəisi
polis general-mayoru Seyidov Mirqafar Mircəfər oğlu

1965-ci ildə Naxçıvan Muxtar Respublikasının Şərur rayonunun Şahtaxtı kəndində anadan olmuşdur. 2005-ci ildə Naxçıvan Dövlət Universitetinin hüquq fakültəsini bitirmişdir.

1983-1985-ci illərdə həqiqi hərbi xidmətdə olmuşdur.

1989-cu ildə daxili işlər orqanlarında xidmətə başlamış, cinayət axtarışı strukturlarında müxtəlif vəzifələrdə işləmişdir. 2005-2007-ci illərdə DİN-in Miqrasiya Xidmətinin rəis müavini, Baş Mütəşəkkil Cinayətkarlıqla Mübarizə İdarəsinin rəis müavini, Daxili Təhlükəsizlik İdarəsinin rəisi, 2007-2014-cü illərdə Baş Mütəşəkkil Cinayətkarlıqla Mübarizə İdarəsinin rəisi vəzifələrində işləmişdir.

2014-cü ilin noyabr ayında Bakı şəhər Baş Polis İdarəsinin rəisi vəzifəsinə təyin olunmuşdur.

Azərbaycan Respublikası Prezidentinin 2009-cu il 1 iyul tarixli 393 nömrəli Sərəncamı ilə polis general-mayoru ali xüsusi rütbəsi verilmişdir.

Cinayətlərin qarşısının alınması və açılması, ictimai təhlükəsizliyin təmin edilməsi sahəsində fərqləndiyinə görə Azərbaycan Respublikası Prezidentinin 2006-cı il 30 iyun tarixli 1545 nömrəli Sərəncamı ilə “İgidliyə görə” medalı ilə təltif olunmuşdur. 

Ailəlidir. Üç övladı var.

 

Bakı şəhər Baş Polis İdarəsi rəisinin əməliyyat işi üzrə
rəis müavini, polis polkovniki Hacıyev Teymur Kamil oğlu


1975-ci ildə Bakı şəhərində anadan olmuşdur. 
1997-ci ildə DİN-in Polis Akademiyasını bitirmişdir.
1993-cü ildən daxili işlər orqanlarında xidmətə başlamış və bu müddət ərzində istintaq xidmətində müxtəlif məsul vəzifələrdə işləmişdir.
2014-2019-cu illərdə DİN-in Baş İstintaq və Təhqiqat İdarəsinin şöbə rəisi və həmin Baş İdarənin rəis müavini, Zərdab rayon Polis Şöbəsinin, Mingəçevir şəhər Polis Şöbəsinin rəisi vəzifələrində xidmət etmişdir.
2019-cu ilin sentyabr ayında Bakı şəhər BPİ rəisinin əməliyyat işi üzrə rəis müavini vəzifəsinə təyin olunmuşdur.
Cinayətkarlığa qarşı mübarizədə, ictimai asayişin mühafizəsində, beynəlxalq əhəmiyyətli kütləvi tədbirlər zamanı ictimai təhlükəsizliyin təmin edilməsində və xüsusi tapşırıqların yerinə yetirilməsində fərqləndiyinə görə Azərbaycan Respublikası Prezidentinin 29 iyun 2019-cu il tarixli 1306 nömrəli sərəncamı ilə “Vətən uğrunda” medalı ilə təltif edilmişdir.
Ailəlidir, 2 övladı var.

 

Bakı şəhər Baş Polis İdarəsi rəisinin xidmət üzrə müavini,
polis general-mayoru Abdullayev Zaur Natiq oğlu

1969-cu ildə Bakı şəhərində anadan olmuşdur.
1990-cı ildə Perm Ali Hərbi Komandirlər Məktəbini, 2016-cı ildə isə DİN-in Polis Akademiyasını bitirmişdir.
1986-cı ildən daxili işlər orqanlarında xidmətə başlamış və bu müddət ərzində müxtəlif məsul vəzifələrdə çalışmışdır.
Müxtəlif illərdə DİN-in Daxili Qoşunlarında tağım, bölük, qərargah rəisi, hərbi hissə komandiri, Əlahiddə Çevik Polis Alayının rəisi vəzifələrində işləmişdir.
2019-cu ilin yanvar ayında Bakı şəhər BPİ rəisinin xidmət üzrə rəis müavini vəzifəsinə təyin olunmuşdur.
Cinayətkarlığa qarşı mübarizədə, ictimai asayişin mühafizəsində, beynəlxalq əhəmiyyətli kütləvi tədbirlər zamanı ictimai təhlükəsizliyin təmin edilməsində və xüsusi tapşırıqların yerinə yetirilməsində xidmətlərinə görə, Azərbaycan Respublikası Prezidentinin Sərəncamı ilə 2015-ci ildə 3-cü dərəcəli "Vətənə xidmətə görə" ordeni ilə təltif edilmiş, 2016-cı ildə polis general-mayoru xüsusi rütbəsi verilmişdir.
Ailəlidir, iki övladı var.

 

Bakı şəhər Baş Polis İdarəsinin rəis müavini,
polis polkovniki Məmmədxanlı Nurullah Abdulla oğlu

1964-cu ildə Baləkən rayonunda anadan olmuşdur.
1985-ci ildə DİN-in Ali Hərbi Siyasi Məktəbini, 2001-ci ildə Moskva Dövlət Akademiyasının hüquq fakültəsini  bitirmişdir.
1985-cı ildən daxili işlər orqanlarında xidmətə başlamış və bu müddət ərzində müxtəlif məsul vəzifələrdə çalışmışdır.
Müxtəlif illərdə DİN-in Daxili Qoşunlarında bölük, tabor, qərargah rəisi, hərbi hissə komandiri, DQBİ-nin Qərargahının əməliyyat şöbəsinin rəisi, Əlahiddə Çevik Polis Alayının komandirinin 1-ci müavini, Bakı şəhər BPİ-nin İctimai Təhlükəsizlik İdarəsinin rəisi vəzifələrində işləmişdir.
2020-ci ilin fevral ayında Bakı şəhər BPİ rəisinin müavini vəzifəsinə təyin olunmuşdur.
Azərbaycan Respublikasının suverenliyi və ərazi bütövlüyü uğrunda – Ağdam, Zəngilan, Fizuli və Ağdərə rayonlarında gedən döyüş əməliyyatlarında iştirak edib.  
Xidməti-döyüş tapşırıqlarının yerinə yetirilməsində, ictimai qaydanın və ictimai təhlükəsizliyin qorunmasında xüsusilə fərqləndiyinə və xidməti vəzifələrinin icrasında yüksək peşəkarlıq göstərdiyinə görə müxtəlif mükafatlara layiq görülmüşdür. Azərbaycan Respublikası Prezidentinin 30 iyun 2002-ci il tarixli Sərəncamı ilə "Vətən uğrunda" medalı ilə təltif olunmuşdur.   
Ailəlidir, iki övladı var