Suraxanı RPİ  30-cu PB əməkdaşlarının keçirdikləri əməliyyat tədbirləri nəticəsində ötən il noyabrın 20-də rayon ərazisindəki mağazaların birindən 500 manat və sənəd oğurlamaqda şübhəli bilinən Bakı şəhər sakini Bəhruz Qəhrəmanov saxlanılmışdır. Ətrafında aparılan tədbirlərlə onun ötən ilin noyabr-dekabr ayları ərzində 5 avtomobildən akkumulyator və inşaat materialları, habelə 1 həyətyanı sahədən 10 ev quşu oğurlaması da müəyyən edilmişdir.

Xəzər RPİ 1-ci PB əməkdaşlarının keçirdikləri əməliyyat tədbirləri nəticəsində ötən il dekabrın 17-dən bu il yanvarın 25-dək olan müddətdə rayon ərazisindəki 7 evdən geyim və məişət əşyaları oğurlamaqda şübhəli bilinən Bakı şəhər sakinləri, əvvəllər məhkum olunmuşlar Nicat Ağabəyov, Elşad Nəsirov və Əskər Əkbərov saxlanılmışlar.

Yanvarın 25-də axşam saatlarında DİN-in “102 Zəng Mərkəzi” Xidmətinə Yasamal rayonu ərazisindəki mənzillərdən birinin eyvanında bir nəfərin qışqıraraq kömək istəməsi barədə məlumat daxil olub. Dərhal Rayon Polis İdarəsi 27-ci Polis Bölməsinin əməkdaşları həmin ünvana gəlib, müvafiq tədbirlər həyata keçirilib, mənzilin qapısı açılıb. Araşdırmalarla həmin şəxsin Bakı şəhər sakini M.Məmmədov olması, internet vasitəsi ilə tanış olduğu Maya adlı qadınla saat 21 radələrində birlikdə həmin evə gəldikləri, bundan təxminən 30 dəqiqə sonra mənzilə daxil olan 3 maskalı şəxsin onun əllərini və ayaqlarını yapışqanlı lentlə stula bağlayaraq döyməsi, cibindəki 150 manatı və mobil telefonunu da götürərək, Maya ilə birlikdə mənzilin qapısını arxadan bağlayaraq getmələri məlum olub. Bundan sonra M.Məmmədov yapışqanlı lent sarğılarını açaraq eyvana çıxıb və  ətrafdakıları köməyə çağırıb. Polis əməkdaşları tərəfindən təxirəsalınmaz əməliyyat-axtarış tədbirlərinə başlanılıb və quldurluğu törətməkdə şübhəli bilinən 4 nəfərin şəxsiyyəti qısa zamanda müəyyən edilib. Görülmüş tədbirlərlə onlardan biri - paytaxt sakini Orxan Hüseynov “isti izlər”lə saxlanılıb. Faktla bağlı cinayət işi başlanılıb. Yasamal Rayon Polis İdarəsi tərəfindən əməliyyat-axtarış tədbirləri davam etdirilir.